In ma desperate quest tae keep masel amused durin lockdoon, aa discovered that aa hinna deen a blog post in ower a year. Spikk aboot time fleein! Aa did hae a draft o a post (dated August 2019) it wis basically aboot how I nivver hae time tae dee onythin cos aa work too much.
Nae muckle his changed since en. Ah’ve only twa jobs noo, bit aa dee a lot mare stuff writin wise, so it is technically 3 although aa still dinna class writin as a job. Ahm still enamoured wae the process o writin an discoverin ither folk’s work. Poetry his been a godsend (as it ayeways his bin) durin lockdoon – ye kin jump in an oot o collections as ye feel like an poems are maistly short – so dinna require mintal amoonts o concentration time like a film or a book.
I’ve been writin a bitty ana – errs a wee group o us dein #EscApril – same idea as #NaPoWriMo – writin a poem ivvry day fer the hale o April. True tae form, I decided it wis a rare idea tae dee baith…FML
I’ve nae managed tae dee baith. I’ve kept up wae the EscApril prompts, but am wye ahin on the NaPoWriMo eens. Ats aright, am savin em up for May. I’ll keep dein it for as lang as lockdoon is on an mibbes beyond, fa kens fit will happen. Ahm gettin summin oot o dein it so as lang as ats the case, I’ll keep dein it!
There’s ither things that hiv been helpin ma tae bide (semi) sane durin iss weird time. Oprah and Deepak meditations are amazin, an Brene Broon’s (Brown) podcast is brilliant. Aa knit squares ana. Started dein it years ago fan aa stopped smokin tae gie ma hauns summin tae dee instead o rollin fags. The intention wis to mak a blunket for masel. Efter movin aroon several times in a few years, ma knittin bug got kinda lost in the cupboard for a filey. Ah wis nae weel ower Christmas an New Year, so hid nae option but tae bide in, so a dug oot ma knittin and started again. The blunket’ll be a bitty squint an multi-coloured like it’s owner, bit it’ll be cosy and mine.
So, that’s anither tick box deen. Update ma blog. Dinna ken fit ahm gan tae dee noo. Mak a cup o cha aa suppose an mibbes read some poems. I’ve a new een – All soul parts returned by Bruce Beasley. It is nithin less than exquisite. Aa might dig oot a few auld faves ana. There’s summin comfortin an familiar in repetition. Or mibbes I’ll jist dee summin frivolous – there’s a great podcast by Russell Brand on Luminary wae Julia Cameron (she wrote The Artist’s Way) and she spikks aboot the need for frivolity an haein fun. Feedin yer inner bairn an aa that. I’ll mibbes dee at then. Tea first though. A wee cup o tea kin makk ye feel like ye kin takk on the warld.
Laters, lockdoon dudes. Peace oot.
talesfaethedoricside 