It’s bin a filey since ma last blog! As ye’ll see fae ma gigs n stuff page, I’ve bin a busy cheil. Nae enough oors in the day maist days an am gettin a bittie burnt oot. Am dein it again…
Roon aboot the end o last year, I wis slowin doon. Ma best pal passed awa an I wis in deep grief (again). I’d made a decision nae to ging mintal lik last time an gradually wear masel intae the grun. I’d also been awarded time wae a creative coach through Coaching for Creatives. Fan I read through their list o folk the fabulous Sarah Longfield jumped oot at ma an I wis like – deffo her. Sarah wis as brilliant as I’d hoped, guidin mi gently through some exercises tae quell ma inner saboteur (the nefarious Gertrude) and helpin ma become a bit mare o a planner, rather than the absolute pantser that I am.
I made a plan. Pit in some fundin applications an bids for ither hings. Ace, noo I kin chill for the shiny season.
It wis a nightmare. Am nae fond o the shiny season as it is, bit iss een wis particularly hideous wae grief sittin on ma lik a weet jaiket. I wis BORED OOT MA NAPPER an couldnae wait tae ging back tae wirk. At wis topped aff bi gettin a knockback for every.single.fuckin.hing I applied for (except one, bit I only got half the money so even at hid severely limited potential) and January lasted 5 million years, so I wis feelin scunnered afore the year hid even stairted.
Then, as ayways, the licht comes…got a few gigs booked in. Anither wee trickle o poems. Couple o wirkshops here an there, and noo it’s halfwye through April an I kin see the chaos comin (for once) so mibbes I need to slow doon a bit again, mak some plans. Weirder hings hiv happened.
Am fair chuffed ma wee poem ‘Waves’ is in an exhibition currently on at The Suttie Arts Space. It’s a tribute tae ma curly heided bestie. I’ve bin readin it at open mics an gigs. Choke every time. It’s a sare een likes. I ken for a fact she’d nae want me to be sittin aboot greetin an mopin, so I’ll hae anither wee bubble an then get on wae it.
Glesga, Oban, Mull an Iona… an Padraig O’Tuama
Towards the end o March, I’d a few things conspire tae happen roon aboot the same time. Wint tae see Yard Act wae ma brither (the OG fave o faves), competed in the Scottish National Slam Championships an got 4th place (nae bad for an auld wifie) an then it wis aff tae Oban for a nicht afore the ferries tae Mull an Iona.
Usually on a retreat, I’d be screivin lik a demon an come hame wae the bones o at least 20 poyums. Iss een wis different, rest, relaxation, conversation – aathin I didnae ken I needed. I’ll get mibbes five poems oot o ma scribbles, am am totes fine wae at. Met amazin, kind, interestin fowk fae aawye. The scran wis top notch, an the view…see abeen. Nae filter required. It wis kin o obvious that I wis the only wirkin class person there, bit for eence, I didna feel less than or wis deekin above ma station. Different, aye, bit nae less.
I even managed tae spikk tae Padraig athoot bein a total gleck. Partial gleck aye, cos I did get a bit fangirl, an I got really emotional thankin him for the podcast Poetry Unbound. It saved me sae mony times ower lockdoon. It still saves me in tough times. I hoard episodes lik a bug o poetry sweeties, so I nivver run oot. If ye dinna ken it, yer in for a treat. It’s lik poetry meditation. Gie it a whirl – ye winna regret it.
On Iona, we wis introduced tae artist Mhairi Killin, fa did a talk for us on the final nicht. Incredible wirk interwoven wae the history an community o the island. Am listenin ma wye through the podcast series fae een o her projects On Sonourous Seas that stairts wae a whale washed up on een o the beaches. I’ll reccomend at ana. Like a podcast, ken.
As weel as aa yon, I’ve hid some stellar gigs, includin performin wae Jackill an Laura Booth at The Lemon Tree efter ‘And the Birds did Sing’, bit the highlight sae far wis the muckle anticipated return o Hysteria at Spin. Fit a rare mix o regulars fae back in the day an new performers. Felt affa humbled tae be headlinin an it felt like comin hame. Superb nicht wae the best folk.
It’s April, which also means EscApril or Glo/NaPoWriMo. Write a poem ivvery day for the hale o April. Iss is the 5th year o dein it wae a wee group online. We hae a FB messenger thread for blethers, accoontability an the occasional moan (we’re poets efter aa, come on), an a Google Doc far we post oor poem o the day. It’s ace fun an I LOVE seein the varied responses each prompt conjures up. I ay get a few beginnins oot o it, which is jist as weel cos am workin on ma second poetry collection. Mare news aboot at waaaay intae the future.
As brilliant as aa iss his bin, am inveigled in enough things anoo, so a wee plan wid help ma nae tak on ower muckle (again). I genuinely love aathin I dee, so it’s nivver a chav. An thank fuck for at, cos somedays life is. I’ve a few artist dates an wee spaceys o creative time carved oot in amongst aa the graftin, itherwise fit’s the point? Aa wirk an nae cairry ons maks Jojo a driech cheil. The plan pairt is for fit comes efter summer…bit dinna watch iss space, cos I only manage tae write in it eence in a blae meen hahaha. Peace oot moofos 💜